منصة الصباح الصباح، منصة إخبارية رقمية
مقالات مشابهة
كيف نقبلوا فيك العزاء
يللي في عز الحزن
ديمة تقابل مبتسم
وتضحك مع كل الاصحاب
وبحضورنا شرهاب
في المقهى ..
وفي الشارع
وفي مرسمك ..
تحكيلنا ع الفن و الموسيقى
وتحكي علي لوحة جديدة ف خاطرك
كيف ترتسم
كيف نقبلوا فيك العزاء
يللي في عز الحزن
ديمة تقابل مبتسم
كيف نقبلوا انك رحلت
وسيبت هالبلد الحزين
من قبل ماتفرح بيوم هناه
زعمه عليه زعلت
زعمة خذل قلبك حبيب
وانت الوفي ماحد يوم خذلت
زعم خانك التعبير
والتلوين والتحبير
وشفت البحر مش ازرق
وشفت الطريق مسكرة
والناس غير الناس
زعم تعبك الاحساس
ان الوطن ممكن في لحظة ينقسم
كيف نقبلوا فيك العزاء
يللي ف عز الحزن
ديمة تقابل مبتسم ..
كيف نقبلوا فيك العزاء
ومن ما يتعزى فيك
ومن هو يعزينا
وكيف ح يكون العزاء
هل ننتفوا اللوحات والفرشاة
ونلخبطوا الالوان
هل نكسروا عودك المتعلق بجنب الباب
ونقاطعوا الالحان
هل نمنعوا التنكيت والضحكات والسهرات
ونحطموا الكيسان
هل ننكروا كل القصائد والشعر اللي انكتب في حضرتك
ونبطلوا الدخان
لو كنت فعلا نعرفك .. نعرف انك ح تقولي :
” اللي يحبني فعلا صحيح
مايقتل الانسان في الانسان
موت البنادم حق .. وما يموتش الفنان ”
كيف نقبلوا فيك العزاء
يللي ف عز الحزن
ديمة تقابل مبتسم ..
_____
سالم العالم
طرابلس 28/5/2020
