منصة الصباح الصباح، منصة إخبارية رقمية
مقالات مشابهة
أنا ليبي
أنا ليبي … وعنواني
وين مـالقلب كان صافي
وفوق من عرش وجداني
تربّع موطني … حافي
تهوى الروح في ابلادي مطارح
فيها انفوس ما تعرف ضغــاين
وفيها الشوق دوم سارح ومارح
هو المدسوس هو اللي اهناك باين
وحتى إن حالها اشتدّت
وظلّت ناس وارتدّت
نعيش انقول انا ليبي
انموت انقول انا ليبي
أنا ليبي … وعنواني
وين مـ القلب كان صافي
انا ليبي .. رغما عن سطير جرحي
ورغم الحزن في اعيوني
ورغم الخوف مـ الأتي
أنا ليبي .. في حزني وفي فرحي
في شكي وفي اضنوني
وحتى فـ كثر آهاتي
ورغما عن ألم فيّا
وحتى إن زادت السيّه
نعيش انقول انا ليبي
انموت انقول انا ليبي
أنا ليبي … وعنواني
وين مـ القلب كان صافي
وفوق من عرش وجداني
تربع موطني … حافي
محمد أميمة
