منصة الصباح الصباح، منصة إخبارية رقمية
مقالات مشابهة
دوائر
محمد علي الدنقلي ..
أنتي الوحيده فوق بيري وارده ..
وأنتي قصيده في أوراقي شارده ..
وانتي غلا .. فوق الغلا ..
ياللي علي ديما جناحك فارده ..
أنتي الوحيده .
** **
أنتي الوحيده اللي رفقها ما انملْ ..
مهما اطوال رحيلي ..
وأنتي القصيده اللي كلامك ما كملْ ..
وانتي دليل دليلي ..
وأن كان كنت معاك .. ما اندوّر ونس ..
الله لايجيب جفاك .. يا نَفْس ونَفَس ..
وانتي علمْ .. فوق العلمْ ..
ياللي علي ديما جناحك فارده ..
انتي الوحيده .
** **
أنتي الوحيد تحت هدبي داسّك ..
وخايف عليك اتطيحي ..
وانتي اللي في وسط قلبي حاسّك ..
يا شفاء تجريحي ..
وانتي امغير اسْماك .. ساعة ينذكر ..
يزهى ورق لاشجار .. ويفوح الزهر ..
ولما يشيع نباك .. ويجينا خبر ..
نشعل شموع الدار .. ويطيب السهر ..
عالم الله غلاك .. ما ينتسى مُحال ..
لو نموت في سبّاك ..
يا أم الهدوب اطوال ..
وعزّ الحياه .. نكونوا سواء ..
ياللي علي ديما جناحك فارده ..
انتي الوحيده ..
