منصة الصباح الصباح، منصة إخبارية رقمية
مقالات مشابهة
شاعر البيضاء
محمد الجويفي
حنين طرابلس مافارق اقليبي يوم ..
والقلب م اللوعه شكا بأشواقه
العين تدمع تباعد عليها النوم ..
ولوعة فراقك يا غاليه حراقه
ياعاصمه ياقلب بلادي الحره ..
يا كل الحلا ذقنا بلاك المره
ياعمر الحيا منك الروح خذتا ..
وصفو السما عاكس الصفو إحساسك
ياشوق اللقا عيني اللي غرتا ..
بكاها علي فرقاك وفرقا ناسك
وحي الجمال اسمعته تكلم فيك ..
ونسج الخيال بالروعه رسملك صوره
والقيت التميز يبحث امغير عليك
بالمختصر مالك مثيل في هالكوره
يامنهل يفيض يروي ضماها الروح ..
بالخط العريض نهونوك مو مسموح ..
ياشمس لا مانك شمس ..
الشمس عنا كل يوم تغيب
وانتي اليوم وبكره وأمس ..
مالك شروق يغيب نين يغيب
فخري نقول طرابلس ونعلي ..
صوتي ويسمعني العالم كله
ليبي تعلي فالسما وتعلي ..
مكانك مكان العز موش الذله ..
تعيشي عزيزه زاهيه براقه
